Pagsulong ng Kaunlaran: San Gabriel, Dumalo sa Ika-4 na Espesyal na Pagpupulong ng La Union PDC

Noong Setyembre 15, 2026, naganap ang 4th Special Meeting ng La Union Provincial Development Council (PDC) kung saan personal na dinaluhan ito ni Mayor Lany B. Carbonell upang makiisa sa pagtataguyod ng mga susunod na hakbang para sa patuloy na pag-asenso ng lalawigan.

Ang naturang pagtitipon ay ginanap sa Vista La Vita at pinangunahan ni Governor Mario Ortega, kasama ang iba’t ibang pinuno ng mga lokal na pamahalaan at katuwang na ahensya. Pinag-usapan sa pagpupulong ang mga pangunahing prayoridad sa pagpapaunlad ng La Union, kabilang ang mga programa at proyektong nakapaloob sa CY 2026 Supplemental Annual Investment Program, mga mahahalagang proyektong pang-imprastruktura para sa komunidad, gayundin ang planong La Union Medical Hub at mga hakbang para sa disaster response at paggaling ng lalawigan.

Sa pamamagitan ng aktibong pagdalo ni Mayor Lany B. Carbonell, patuloy na pinatitibay ng LGU San Gabriel ang pakikipagtulungan nito sa Pamahalaang Panlalawigan ng La Union. Layunin nitong masigurong ang mga programa para sa mas maayos na serbisyo, matatag na komunidad, at inklusibong kaunlaran ay direktang maramdaman ng bawat mamamayan.